Ang Rewards for Justice ay naghahandog ng gantimpalang hanggang $5 milyon para sa impormasyon tungkol kay Mohamed Makawi Ibrahim Mohamed. Siya ang lider ng pag-atake na pumatay sa mga empleyado ng U.S. Agency for International Development (USAID) na sina John Granville at Abdelrahman Abbas Rahama sa Khartoum noong Enero 1, 2008. Si Makawi ay may mga kaugnayan sa isang grupo sa Sudan na tinatawag na al-Qa’ida in the Land of the Two Niles, na nagplano ng pag-atake sa mga interes ng Estados Unidos, taga-Kanluran, at Sudan.
Ang hukuman ng Sudan ay nilitis at hinatulan si Makawi ng kamatayan noong 2009 para sa kanyang pagkakasangkot sa mga pagpatay. Ngunit tumakas si Makawi sa bilangguan noong Hunyo 10, 2010, bago maipatupad ang kanyang sentensya. Nananatili siyang pinaghahanap at pinaniniwalaang nasa Somalia.
Noong Enero 8, 2013, itinalaga ng U.S. Department of State si Makawi bilang isang Specially Designated Global Terrorist (Espesyal na Itinalagang Pandaigdigang Terorista) alinsunod sa Executive Order 13224, ayon sa pagkakaamyenda nito. Bilang resulta ng pagkakatalagang ito, bukod sa iba pang mga konsekwensya, ang lahat ng ari-arian, at mga interes sa ari-arian, ni Makawi na sumasailalim sa hurisdiksyon ng Estados Unidos ay hinarang, at ang mga mamamayan ng Estados Unidos sa pangkalahatan ay pinagbabawalang makibahagi sa anumang mga transaksyong nauugnay kay Makawi.
