Ang Rewards for Justice ay naghahandog ng gantimpalang hanggang $5 milyon para sa impormasyon tungkol kay Khalil al-Rahman Haqqani na kilala rin bilang si Khalil Haqqani o Khalil Ahmad Haqqani. Si Khalil ay nagsisilbi bilang pangunahing lider ng Haqqani Network (HQN), isang itinalaga ng Estados Unidos na Foreign Terrorist Organization (FTO, Banyagang Teroristang Organisasyon).
Si Khalil ay nakikibahagi sa mga aktibidad ng paglikom ng pondo sa ngalan ng Taliban at nagbibigay ng suporta sa Taliban na nagpapatakbo sa Afghanistan. Sa unang bahagi ng 2010, nagbigay siya ng mga pondo sa mga selula ng Taliban sa Probinsya ng Logar sa Afghanistan. Noong 2009, si Khalil ang isa sa ilang taong responsable sa pagkulong ng mga indibidwal na binihag ng Taliban at ng HQN. Si Khalil ay nagsagawa ng mga operasyon para sa Taliban sa mga utos na mula sa kanyang pamangkin na si Sirajuddin Haqqani, ang pangkalahatang lider ng HQN at deputadong lider ng Taliban. Kumilos din si Khalil sa ngalan ng al-Qa’ida (AQ) at naiugnay sa mga teroristang operasyon ng AQ. Noong 2002, pinalabas niya ang mga mandirigma upang paigtingin ang mga elemento ng AQ sa Probinsya ng Paktia, Afghanistan.
Noong Pebrero 9, 2011, itinalaga ng U.S. Department of Treasury si Khalil Haqqani bilang isang Specially Designated Global Terrorist (Espesyal na Itinalagang Pandaigdigang Terorista) alinsunod sa Executive Order 13224, ayon sa pagkakaamyenda nito. Bilang resulta ng pagkakatalagang ito, bukod sa iba pang mga konsekwensya, ang lahat ng ari-arian, at mga interes sa ari-arian, ni Khalil Haqqani na sumasailalim sa hurisdiksyon ng Estados Unidos ay hinarang, at ang mga mamamayan ng Estados Unidos sa pangkalahatan ay pinagbabawalang makibahagi sa anumang mga transaksyong nauugnay kay Khalil Haqqani. Bukod dito, isang krimen ang sadyang pagbibigay, o pagtatangka o pakikipagsabwatan upang magbigay, ng materyal na suporta o mga mapagkukunan sa FTO na HQN.
