Ang Rewards for Justice ay naghahandog ng gantimpalang hanggang $5 milyon para sa impormasyon tungkol kay Aziz Haqqani na kilala rin bilang si Abdul Aziz Haqqani. Si Aziz ay ang pangunahing lider ng Haqqani Network (HQN), isang itinalaga ng Estados Unidos na Foreign Terrorist Organization (FTO, Banyagang Teroristang Organisasyon) at kapatid ng lider ng HQN at deputadong lider ng Taliban na si Sirajuddin Haqqani.

Si Aziz ay naging sangkot sa pagpaplano at pagsasagawa ng mga pag-atakeng gamit ang ginawang aparatong pasabog laban sa mga pinupuntirya sa pamahalaan ng Afghanistan, at inamin ang responsibilidad para sa lahat ng malaking pag-atake ng HQN pagkatapos mamatay ng kanyang kapatid na si Badruddin Haqqani. Malalim ang pagkakasangkot ni Aziz sa mga lohistikong operasyon at pagpapasya sa mga pag-atake ng HQN laban sa mga taga-Afghanistan at puwersang Koalisyon sa hanay ng hangganang Afghanistan-Pakistan. Bukod dito, nagsilbi siya bilang pangunahing tulay ng HQN para sa mga operasyon sa Kabul at mga kilalang pag-atake sa buong Afghanistan.

Noong Agosto 25, 2015, itinalaga ng U.S. Department of State si Aziz Haqqani bilang isang Specially Designated Global Terrorist (Espesyal na Itinalagang Pandaigdigang Terorista) alinsunod sa Executive Order 13224, ayon sa pagkakaamyenda nito. Bilang resulta ng pagkakatalagang ito, bukod sa iba pang mga konsekwensya, ang lahat ng ari-arian, at mga interes sa ari-arian, ni Aziz Haqqani na sumasailalim sa hurisdiksyon ng Estados Unidos ay hinarang, at ang mga mamamayan ng Estados Unidos sa pangkalahatan ay pinagbabawalang makibahagi sa anumang mga transaksyong nauugnay kay Aziz Haqqani. Bukod dito, isang krimen ang sadyang pagbibigay, o pagtatangka o pakikipagsabwatan upang magbigay, ng materyal na suporta o mga mapagkukunan sa FTO na HQN.