حقاني نيٽ ورڪ (ايڇ ڪيو اين) افغانستان ۽ پاڪستان ۾ ڪارروايون ڪندڙ ويڙهاڪ تنظيم آهي جيڪا 1980ع واري ڏهاڪي جي آخر ۾ قائم ڪئي وئي هئي. ايڇ ڪيو اين افغانستان ۾ آمريڪي ۽ اتحادي فورسز، افغان حڪومت ۽ شهري هدفن خلاف ڪيترائي حملا ڪيا آهن ۽ انهن حملن ۽ اغوا جي وارداتن جي منصوبابندي ڪئي آهي. جون 2002ع ۾ ايڇ ڪيو اين خوست افغانستان ۾ آمريڪي فوجي اڏي تي آپگهاتي حملو ڪيو جنهن جي نتيجي ۾ 2 آمريڪي فوجي مارجي ويا ۽ 100 کان وڌيڪ زخمي ٿي پيا. افغان اختياريون ايڇ ڪيو اين تي مئي 2017ع ۾ ڪابل ۾ ٿيل ٽرڪ بم حملي جو الزام مڙهين ٿيون جنهن جي نتيجي ۾ 150 کان وڌيڪ ماڻهو مارجي ويا هئا. ايڇ ڪيو اين کي جنوري 2018ع ۾ ڪابل ۾ ايمبولينس بم حملي جو ذميوار سمجهيو وڃي ٿو جنهن جي نتيجي ۾ 100 کان وڌيڪ ماڻهن پنهنجون حياتيون وڃايون. افغان اختياريون ايڇ ڪيو اين تي جنوري 2018ع تي ڪابل ۾ انٽر ڪانٽينينٽل هوٽل تي حملي جو الزام پڻ مڙهين ٿيون جنهن ۾ 22 ماڻهو مارجي ويا هئا.
19 سيپٽمبر 2012ع تي آمريڪا جي پرڏيهي وزارت ايڇ ڪيو اين کي ترميم ٿيل اميگريشن اينڊ نيشنلٽي ايڪٽ جي سيڪشن 219 تحت پرڏيهي دهشتگرد تنظيم نامزد ڪيو. ان کان اڳ 7 سيپٽمبر 2012ع تي آمريڪي پرڏيهي وزارت ترميم ٿيل ايگزيڪيوٽو آرڊر 13224 مطابق ايڇ ڪيو اين کي خاص طور تي نامزد عالمي دهشتگرد طور نامزد ڪيو هو. نتيجي طور آمريڪا جي دائره اختيار ۾ ايندڙ ايڇ ڪيو اين جي ملڪيت ۽ ملڪيت ۾ مفاد بلاڪ ڪيا ويا آهن ۽ آمريڪي شهرين تي ايڇ ڪيو اين سان ڪنهن به قسم جي ڏيتي ليتي ڪرڻ تي پابندي مڙهي وئي آهي. ايڇ ڪيو اين کي ڄاڻي واڻي سامان يا وسيلن جي فراهمي يا ان جي ڪوشش يا سازش ڪرڻ هڪ ڏوهه آهي.
