ريوارڊز فار جسٽس حافظ سعيد بابت معلومات جي فراهمي تي 10 ملين آمريڪي ڊالرن تائين انعام جي آڇ ڪري ٿو جيڪو آمريڪا طرفان پرڏيهي دهشتگرد تنظيم (ايف ٽي او) طور نامزد ٿيل لشڪر طيبه (ايل اي ٽي) جو باني ۽ سربراهه آهي. سعيد نومبر 2008ع تي ڀارت جي شهر ممبئي تي چئن ڏينهن تائين هلندڙ دهشتگرد حملي جي منصوبابندي ۾ حصو ورتو، جنهن ۾ 6 آمريڪي شهرين سميت 166 ڄڻا مارجي ويا هئا.

2020ع ۾ هڪ پاڪستاني دهشتگردي ٽوڙ عدالت دهشتگردي جي مالي مدد جي ڪيترن ئي الزامن هيٺ ڏوهي قرار ڏيندي جيل جي سزا ٻڌائي. آمريڪا سعيد بابت معلومات حاصل ڪرڻ جو سلسلو جاري رکندو پيو اچي ڇوجو پاڪستان جي عدالتي نظام ماضي ۾ لشڪر طيبه جي سزا يافته اڳواڻن ۽ ڪارندن کي آزاد ڪيو آهي.

27 مئي 2008ع تي آمريڪا جي ناڻي واري کاتي سعيد کي ترميم ٿيل ايگزيڪيوٽو آرڊر 13224 تحت خاص طور تي نامزد عالمي دهشتگرد طور نامزد ڪيو. ان نامزدگي جي نتيجي ۾ ٻين نتيجن طور آمريڪا جي دائره اختيار ۾ ايندڙ سعيد جي سموري ملڪيت ۽ ملڪيت ۾ مفاد بلاڪ ڪيا ويا آهن ۽ آمريڪي شهرين تي سعيد سان ڪنهن به قسم جي ڏيتي ليتي ڪرڻ تي پابندي مڙهي وئي آهي. ان کان علاوه آمريڪا طرفان پرڏيهي دهشتگرد تنظيم طور نامزد ٿيل ايل اي ٽي کي ڄاڻي واڻي مادي مدد يا وسيلن جي فراهمي يا ان جي ڪوشش يا سازش ڪرڻ هڪ ڏوهه آهي. 10 ڊسمبر 2008ع تي سعيد جو نالو گڏيل قومن جي 1267/1989 القاعده پابندين جي ڪميٽي ۾ القاعده دهشتگرد تنظيم سان لاڳاپيل هڪ فرد طور داخل ڪيو ويو هو ۽ اهڙي طرح بين الاقوامي پابندين هيٺ اچي ويو.