پاڪستان ۽ افغانستان ۾ موجود دهشتگرد تنظيم تحريڪ طالبان پاڪستان (ٽي ٽي پي) 2007ع ۾ وجود ۾ آئي. ٽي ٽي پي جو مقصد خيبرپختونخوا صوبي (جنهن کي اڳ ۾ وفاق جي ماتحت علائقا يا فاٽا چيو ويندو هو) مان پاڪستاني حڪومت کي ٻاهر ڪڍڻ ۽ دهشتگردي جي ڪارروائين وسيلي شرعي قانون لاڳو ڪرڻ آهي. ٽي ٽي پي نظرياتي رهنمائي القاعدہ کان حاصل ڪري ٿي جڏهن ته القاعدہ جا عنصر افغانستان ۽ پاڪستان جي سرحدي علائقن ۾ محفوظ پناهگاهن لاءِ ڪنهن حد تائين ٽي ٽي پي تي ڀاڙين ٿا. ان جي نتيجي ۾ ٽي ٽي پي کي القاعدہ جي عالمي دهشتگرد نيٽ ورڪ ۽ سندس ميمبرن جي آپريشنل مهارت تائين پهچ حاصل ٿي آهي.
ٽي تي پي پاڪستاني ۽ آمريڪي مفادن خلاف دهشتگردي جا ڪيترائي حملا ڪيا آهن ۽ انهن جي ذميواري قبول ڪئي آهي جن ۾ ڊسمبر 2009ع ۾ خوست افغانستان ۾ آمريڪي فوجي اڏي تي آپگهاتي حملو جنهن ۾ 7 آمريڪي شهري مارجي ويا، پشاور ۾ آمريڪي قونصل خاني تي آپگهاتي بم حملو، جنهن ۾ 6 پاڪستاني شهري مارجي ويا، شامل آهي. ٽي ٽي پي تي 2007ع ۾ پاڪستان جي اڳوڻي وزيراعظم بينظير ڀٽو جي قتل ۾ ملوث هجڻ جو شڪ آهي. ٽي ٽي پي پهرين مئي 2010ع تي نيويارڪ شهر جي ٽائيمز اسڪوائر تي فيصل شهزاد جي بارودي مواد سان ڌماڪو ڪرڻ جي ناڪام ڪوشش لاءِ هدايتون ۽ سهولتون فراهم ڪيون.
پهرين سيپٽمبر 2010ع تي آمريڪا جي پرڏيهي وزارت ٽي ٽي پي کي ترميم ٿيل اميگريشن اينڊ نيشنلٽي ايڪٽ جي سيڪشن 219 تحت پرڏيهي دهشتگرد تنظيم ۽ ترميم ٿيل ايگزيڪيوٽو آرڊر 13224 مطابق خاص طور تي نامزد عالمي دهشتگرد نامزد ڪيو. نتيجي طور آمريڪا جي دائره اختيار ۾ ايندڙ ٽي ٽي پي جي ملڪيت ۽ ملڪيت ۾ مفاد بلاڪ ڪيا ويا آهن ۽ آمريڪي شهرين تي ٽي ٽي پي سان ڪنهن به قسم جي ڏيتي ليتي ڪرڻ تي پابندي مڙهي وئي آهي. ٽي ٽي پي کي ڄاڻي واڻي سامان يا وسيلن جي فراهمي يا ان جي ڪوشش يا سازش ڪرڻ هڪ ڏوهه آهي.
