په عراق او سوریه کې اسلامي دولت (داعش) په عراق کې د القاعدې له پاتې شونو څخه راپورته شو. دغې ډلې د خپلو سیمه ییزو ارمانونو د څرګندولو لپاره د داعش نوم غوره کړ ځکه چې د سوریې د جګړې د شاملولو لپاره یې عملیات پراخ کړل. د داعش مشري ابوبکر البغدادي کوله، چې د 2014 کال په جون میاشت کې یې د اسلامي خلافت د جوړولو اعلان وکړ، هغه د 2019 کال د اکتوبر په 27 د هغه د نیولو لپاره د امریکا د پوځي عملیاتو په ترڅ کې ووژل شو. داعش په سوریه کې له جګړې او په عراق کې د فرقه ییزو تاوتریخوالو څخه ګټه پورته کړه، چې په دواړو هېوادونو کې یې د سیمې کنټرول ترلاسه کړ. په 2019 کې، د داعش ماتولو لپاره نړیوال ایتلاف —چې د څو ملګرو هیوادونو او نړیوالو ادارو په ګډون —په سوریه او عراق کې د داعش تر کنټرول لاندې ټولې سیمې ازادې کړې. په عراق، سوریه او نورو هیوادونو کې د دغې ډلې پر ضد هڅې دوام لري.
د 2015 کال په نومبر کې داعش په پاریس کې یو لړ همغږي بریدونه ترسره کړل چې د یوه امریکايي په ګډون یې شاوخوا 130 کسان ووژل او تر 350 ډېر نور یې ټپیان کړل. د 2016 کال په مارچ میاشت کې، داعش په بروکسل کې په ورته وخت کې دوه بریدونه وکړل چې د څلورو امریکایي اتباعو په ګډون یې 32 کسان ووژل او تر 250 ډېر یې ټپیان کړل. د 2016 کال په جون میاشت کې یوه وسله وال چې له داعش سره یې بیعت وکړ، د فلوریډا په اورلانډو کې د پلس نایټ کلب کې 49 کسان ووژل او 53 نور یې ټپیان کړل. د 2016 کال د جولای په میاشت کې، داعش د یوه برید پړه منلې وه چې په ترڅ کې یې یوه ترهګر چې د بار وړونکي لارۍ موټر چلاوه د فرانسې په نیس ښار کې د باستیل د ورځې د لمانځنې پر مهال په یوه ګڼه ګوڼه ځای باندي برید وکړ چې په پایله کې یې د دریو امریکایي اتباعو په ګډون 86 تنه ووژل شول. د 2019 کال په جنورۍ کې، داعش د سوریې په منبج کې په یوه رستورانت کې د ځانمرګي برید مسوولیت په غاړه واخیست، چې د څلورو امریکایانو په ګډون یې 19 کسان ووژل. په سریلانکا کې د 2019 کال د ایسټر د یکشنبې په ورځ، د پنځو امریکایي اتباعو په ګډون تر 250 ډېر کسان ووژل شول، کله چې د داعش له خوا هڅول شویو ترهګرو په ګڼو کلیساګانو او هوټلونو کې همغږي ځانمرګي بریدونه وکړل.
د دسمبر په 17، 2004 کې، د متحده ایالاتو د بهرنیو چارو وزارت د مهاجرت او تابعیت قانون د 219 برخې ، د تعدیل سره سم AQI (اوس د داعش ISIS په نوم پیژندل شوی) د بهرني ترهګریز سازمان په توګه ونماوه. پخوا، د 2004 کال د اکتوبر په 15، د بهرنیو چارو وزارت AQI د 13224 اجرایوي حکم سره سم ،لکه څنګه چي تعدیل شوي، په ځانګړي ډول نومول شوي نړیوال ترهګر په توګه ونماوه. د پایلې په توګه، د داعش ټول ملکیتونه، او په ملکیت کې ګټې، د متحده ایالاتو د قضا سره مخ دي، او د متحده ایالاتو وګړي په عمومي توګه د داعش سره د هر ډول معاملو کې ښکیلتیا څخه منع دي. دا یو جرم دی چې په پوهه توګه داعش ته مادي ملاتړ یا سرچینې چمتو کړي، یاددسیسې جوړولو هڅه وکړي .
