ກຸ່ມ ISIS ໃນແຜ່ນດິນໃຫ່ຍຊາຮາຣາ (ISIS-GS) ກໍ່ຕັ້ງຂຶ້ນໃນປີ 2015 ພາຍຫລັງແຍກຕົວອອກຈາກ ອາລ-ມູຣາບິທູນ (Al-Mourabitoun), ແມ່ນກຸ່ມທີ່ແຍກອອກຈາກ ອາລ –ໄກດາ ແລະ ໄດ້ສາບານສະຫວາມິພັກຕໍ່ກຸ່ມ ISIS. ໃນເບື້ອງຕົ້ນແມ່ນມີຖານທີ່ໜັ້ນໃນມາລີ ແລະປະຕິບັດການຕາມຊາຍແດນ ມາລີ–ໄນເຈີ, ກຸ່ມຍັງເຄື່ອນໄຫວໃນ Burkina Faso ເຊັ່ນດຽວກັນ. ISIS-GS ໄດ້ອ້າງຄວາມຮັບຜິດຊອບຕໍ່ການໂຈມຕີຫລາຍຄັ້ງ, ລວມເຖິງ ການໂຈມຕີການລາດຕະເວນຮ່ວມຂອງ ສະຫະລັດ–ໄນເຈີໃນເຂດ ຕອນໂກ ຕອນໂກ, ປະເທດໄນເຈີ ໃນວັນທີ 4 ຕຸລາ 2017 ເຊິ່ງເຮັດໃຫ້ທະຫານສະຫະລັດສີ່ຄົນ ແລະ ທະຫານໄນເຈີສີ່ຄົນ ເສຍຊີວິດ. ໃນເດືອນ ພະຈິກ 2019, ISIS-GS ໄດ້ເລີ່ມການບຸກໂຈມຕີຖານກອງທັບທະຫານມາລີ ແລະ ເຮັດໃຫ້ ທະຫານ 54 ຄົນເສຍຊີວິດ.
ໃນວັນທີ 23 ພຶດສະພາ 2018, ກະຊວງການຕ່າງປະເທດ ສະຫະລັດໄດ້ຕັ້ງຊື່ ISIS- GS ເປັນ ອົງການກໍ່ການຮ້າຍຕ່າງປະເທດ ພາຍໃຕ້ຂໍ້ກົດໝາຍ 219 ຂອງກົດໝາຍວ່າດ້ວຍສັນຊາດ ແລະການເຂົ້າເມືອງ ໃນສະບັບປັບປຸງ. ຜ່ານມາ, ໃນວັນທີ 16 ພຶດສະພາ 2018, ກະຊວງ ການຕ່າງປະເທດໄດ້ຕັ້ງຊື່ ISIS- GS ເປັນຜູ້ກໍ່ການຮ້າຍລະດັບໂລກທີ່ໄດ້ຮຽກເປັນພິເສດ ອີງຕາມຄຳສັ່ງພິເສດ 13224, ໃນສະບັບປັບປຸງ. ດັ່ງນັ້ນ, ຊັບສິນ ແລະ ຜົນປະໂຫຍດໃນຊັບສິນທັງໝົດຂອງ ກຸ່ມ ISIS- GS, ທີ່ຢູ່ໃນພາຍໃຕ້ຂອບເຂດອຳນາດຂອງສະຫະລັດແມ່ນຖືກກີດກັ້ນ ແລະ ໂດຍທົ່ວໄປ, ພົນລະເມືອງສະຫະລັດແມ່ນຖືກຫ້າມໃນການມີສ່ວນຮ່ວມດຳເນີນທຸລະກຳໃດໆກັບ ISIS- GS. ຈະມີໂທດໃນການສະໜອງ ຫລື ພະຍາຍາມ ຫລື ຄົບຄິດກັນໃນການສະໜອງ, ການຊ່ວຍເຫລືອດ້ານວັດສະດຸ ຫລື ຊັບພະຍາກອນໃຫ້ ກຸ່ມ ISIS- GS ໂດຍຕັ້ງໃຈ ເຖິງຈະຮູ້ວ່າກະທຳຜິດ.
