ກຸ່ມຈາມັຕ ນຸສຣັຕ ອາລ-ອິສລາມ ວາລ-ມຸສລີມິນ (JNIM) ໄດ້ເອີ້ນຕົນເອງວ່າເປັນສາຂາທາງການຂອງ ອາລ ໄກດາໃນປະເທດມາລີ. ໃນປີ 2017, ສາຂາປະຈຳຊາຮາຣາຂອງ ອາລ –ໄກດາ ໃນມາເກັຣບອິສລາມ, ອາລມູຣາບິທູນ, ອານຊາຣ ອາລດິນ ແລະ ແນວຮ່ວມປົດປ່ອຍມາຊິນາ ຈັບມືກັນເພື່ອສ້າງຕັ້ງ JNIM. ການປະຕິບັດການໃນມາລີ, ໄນເຈີ ແລະ Burkina Faso, ກຸ່ມ JNIM ຮັບຜິດຊອບຕໍ່ການໂຈມຕີ ແລະການລັກພາຕົວຫລາຍເຫດການ. ໃນເດືອນ ມິຖຸນາ 2017, JNIM ໄດ້ປະຕິບັດການການໂຈມຕີຣີຊອດທີ່ມີຄົນຕາເວັນຕົກມາພັກເປັນປະຈຳນອກ ນະຄອນຫລວງບາມາໂກ ແລະ ຮັບຜິດຊອບສຳລັບການໂຈມຕີປະສານກັນເປັນວົງກວ້າງໃນ ເມືອງວາກາດູກູ ໃນວັນທີ 2 ມີນາ 2018. ໃນເດືອນກັນຍາ, JNIM ກົດທຸ່ນລະເບີດຢູ່ກ້ອງລົດເມໂດຍສານໃນກາງເມືອງຂອງປະເທດມາລີ, ເຮັດໃຫ້ມີພົນລະເຮືອນຕາຍ 14 ແລະ ບາດເຈັບ 24 ຄົນ.
ໃນວັນທີ 06 ກັນຍາ 2018, ກະຊວງການຕ່າງປະເທດ ສະຫະລັດໄດ້ຕັ້ງຊື່ JNIM ເປັນ ອົງການກໍ່ການຮ້າຍຕ່າງປະເທດ ພາຍໃຕ້ຂໍ້ກົດໝາຍ 219 ຂອງກົດໝາຍວ່າດ້ວຍສັນຊາດ ແລະການເຂົ້າເມືອງ ຕາມທີ່ໄດ້ແກ້ໄຂ. ຜ່ານມາ, ໃນວັນທີ 05 ກັນຍາ 2018, ກະຊວງ ການຕ່າງປະເທດໄດ້ຕັ້ງຊື່ JNIM ເປັນຜູ້ກໍ່ການຮ້າຍລະດັບໂລກທີ່ໄດ້ຮຽກເປັນພິເສດ ອີງຕາມຄຳສັ່ງພິເສດ 13224, ໃນສະບັບປັບປຸງ. ດັ່ງນັ້ນ, ຊັບສິນ ແລະ ຜົນປະໂຫຍດໃນຊັບສິນທັງໝົດຂອງ ກຸ່ມ JNIM, ທີ່ຢູ່ໃນພາຍໃຕ້ຂອບເຂດອຳນາດຂອງສະຫະລັດແມ່ນຖືກກີດກັ້ນ ແລະ ໂດຍທົ່ວໄປ, ພົນລະເມືອງສະຫະລັດແມ່ນຖືກຫ້າມໃນການມີສ່ວນຮ່ວມດຳເນີນທຸລະກຳໃດໆກັບ JNIM. ຈະມີໂທດໃນການສະໜອງ ຫລື ພະຍາຍາມ ຫລື ຄົບຄິດກັນໃນການສະໜອງ, ການຊ່ວຍເຫລືອດ້ານວັດສະດຸ ຫລື ຊັບພະຍາກອນໃຫ້ ກຸ່ມ JNIM ໂດຍຕັ້ງໃຈ ເຖິງຈະຮູ້ວ່າກະທຳຜິດ.
