Lashkar-e Tayyiba, (LeT), ຍັງຮູ້ກັນໃນຊື່ ກອງທັບແຫ່ງຄວາມຊອບທຳ ເປັນ ກຸ່ມກໍ່ການຮ້າຍທີ່ມີຖານທີ່ໜັ້ນຢູ່ໃນປາກີສຖານ ເຊິ່ງກໍ່ຕັ້ງໃນຊຸມປີ 1980. LeT ໄດ້ລົງມືປະຕິບັດການ, ລວມເຖິງການໂຈມຕີ ທີ່ເປັນທີ່ໜ້າສົນໃຈຫລາຍເຫດການ, ຕໍ່ຕ້ານທະຫານອິນເດຍ ແລະເອົາພົນລະເຮືອນເປັນເປົ້ານັບແຕ່ປີ 1993. ນອກນັ້ນກຸ່ມຍັງໄດ້ໂຈມຕີກອງທະຫານປະສົມໃນ ອັຟການີສຖານ. LeT ຮັບຜິດຊອບຕໍ່ການກໍ່ການຮ້າຍໃນເດືອນພະຈິກ 2008 ທີ່ເມືອງມຸມໄບ, ອິນເດຍ ເຊິ່ງເຮັດໃຫ້ 166 ຄົນເສຍຊີວິດ—ລວມເຖິງຄົນສັນຊາດອາເມລິການຫົກຄົນ ແລະ ບາດເຈັບເກີນ 300 ຄົນ.

ໃນວັນທີ 26 ທັນວາ 2001, ກະຊວງການຕ່າງປະເທດ ສະຫະລັດໄດ້ຕັ້ງຊື່ LeT ເປັນ ອົງການກໍ່ການຮ້າຍຕ່າງປະເທດ ພາຍໃຕ້ຂໍ້ກົດໝາຍ 219 ຂອງກົດໝາຍວ່າດ້ວຍສັນຊາດ ແລະການເຂົ້າເມືອງ ໃນສະບັບປັບປຸງ. ຜ່ານມາ, ໃນວັນທີ 20 ທັນວາ 2001, ກະຊວງ ການຕ່າງປະເທດໄດ້ຕັ້ງຊື່ LeT ເປັນຜູ້ກໍ່ການຮ້າຍລະດັບໂລກທີ່ໄດ້ຮຽກເປັນພິເສດ ອີງຕາມຄຳສັ່ງພິເສດ 13224, ໃນສະບັບປັບປຸງ. ດັ່ງນັ້ນ, ຊັບສິນ ແລະ ຜົນປະໂຫຍດໃນຊັບສິນທັງໝົດຂອງ ກຸ່ມ LeT, ທີ່ຢູ່ໃນພາຍໃຕ້ຂອບເຂດອຳນາດຂອງສະຫະລັດແມ່ນຖືກກີດກັ້ນ ແລະ ໂດຍທົ່ວໄປ, ພົນລະເມືອງສະຫະລັດແມ່ນຖືກຫ້າມໃນການມີສ່ວນຮ່ວມດຳເນີນທຸລະກຳໃດໆກັບ ກຸ່ມ LeT. ຈະມີໂທດໃນການສະໜອງ ຫລື ພະຍາຍາມ ຫລື ຄົບຄິດກັນໃນການສະໜອງ, ການຊ່ວຍເຫລືອດ້ານວັດສະດຸ ຫລື ຊັບພະຍາກອນໃຫ້ LeT ໂດຍຕັ້ງໃຈ ເຖິງຈະຮູ້ວ່າກະທຳຜິດ.