«خەڵات بۆ دادپەروەری» لەبری زانیاری پەیوەست بە محمود عبدی عدن و هەر کەسێکی تری بەرپرسیار لە هێرشەکەی تیرۆریستانی الشباب بۆ سەر کۆمەڵگەی هۆتێل DusitD2 لە نایرۆبی، پێتەختی وڵاتی کینیا لە ساڵی 2019 تاکوو 10 ملیۆن دۆلار خەڵات دەدات. پاشنیوەڕۆی ڕۆژی 15ی کانوونی دووەمی 2019، چەکدارانی الشباب بە تەقەمەنی و چەکی ئۆتۆماتیکی و نارنجۆک هێرشیان کردە سەر ناوەندی بازرگانی DusitD2. ئەم کۆمەڵگە 6 نهۆمە لە کۆمەڵێک دوکان و ئۆفیس و هۆتێلێک پێک دێت. لە ئەنجامی هێرشەکەدا لانیکەم 21 کەس کوژران کە یەکێکیان هاووڵاتی ئەمریکی بوو. الشباب – لقێکی ڕێکخراوی تیرۆریستی ئەلقاعیدە – لە ڕێگەی شهادەی ئاژانسی فەرمی خۆیەوە، وێنەی ڕاستەوخۆی هێرشەکەی گواستەوە و بە بڵاوکردنەوەی بەیاننامەیەکی فەرمی ڕایگەیاند کە هێرشەکە بە ئەمری ئەیمەن ظواهری، سەرکردەی ئەوکاتەی ئەلقاعیدە، ئەنجام دراوە.
عدن، سەرکردەیەکی الشباب، یارمەتیدەر بوو لە پلاندانان بۆ هێرشەکەی کانوونی دووەمی ساڵی 2019. لە 17ی تشرینی یەکەمی 2022، وەزارەتی دەرەوە بەپێی بڕیاری جێبەجێکاری (E.O.) عدنی وەک تیرۆریستێکی نێودەوڵەتی تایبەت (SDGT) دیاری کرد. 13224، هەموارکراو.
الشباب لە چەندین هێرشی تیرۆریستی لە کینیا و سۆماڵیا و وڵاتانی دراوسێدا دەستی هەبووە. لە ئەنجامی ئەو هێرشانەدا هەزاران کەس کوژراون کە هاووڵاتی ئەمریکیشیان تێدا بووە. وەزارەتی دەرەوە لە مانگی ئازاری 2008 «الشباب»ی وەک ڕێکخراوێکی تیرۆریستی بیانی (FTO) و تیرۆریستی نێودەوڵەتی تایبەت (SDGT) دیاری کرد. هەروەها لە مانگی نیسانی 2010، «لیژنەی ئابلۆقەکانی سۆماڵیا»ی ئەنجومەنی ئاسایشی نەتەوە یەکگرتووەکان، بەپێی بڕگەی 8ی بڕیارنامەی 1844 (2008) الشبابی وەک گرووپێکی تیرۆریستی ڕاگەیاند.
