កងកម្លាំង Qods នៃក្រុមឆ្មាំបដិវត្តឥស្លាម (IRGC-QF) ដែលជាសាខាមួយរបស់ក្រុម IRGC គឺជាយន្តការដ៏ចម្បងរបស់អ៊ីរ៉ង់ ក្នុងការជ្រោមជ្រែង និង គាំទ្រដល់បណ្តាក្រុមភេវករនៅបរទេស ។ អ៊ីរ៉ង់ប្រើប្រាស់ក្រុម IRGC-QF ឲ្យអនុវត្តគោលបំណងគោលនយោបាយការបរទេសរបស់ខ្លួន, បិទបាំងប្រតិការស៊ើបយកការណ៍ និងបង្កអស្ថិរភាពក្នុងមជ្ឈិមបូព៌ា ។ ក្នុងឆ្នាំ ២០១១ ក្រុម IRGC-QF បានរៀបផែនការសម្ងាត់ដើម្បីធ្វើឃាតឯកអគ្គរដ្ឋទូត សាអូឌីត ប្រចាំសហរដ្ឋអាមេរិក ក្នុងទីក្រុង វ៉ាស៊ីនតោន ឌីស៊ី ។ ក្នុងឆ្នាំ ២០១២ ភ្នាក់ងារសម្ងាត់របស់ក្រុម IRGC-QF ត្រូវបានចាប់ខ្លួនក្នុងប្រទេសតួកគី និង កេនយ៉ា ពីបទរៀបចំផែនការសម្ងាត់ដើម្បីធ្វើការវាយប្រហារ ។ នៅខែមករា ឆ្នាំ ២០១៨ ប្រទេសអាល្លឺម៉ង់ បានលាតត្រដាងពីភ្នាក់ងារសម្ងាត់របស់ក្រុម IRGC ចំនួន ១០ នាក់ ដែលជាប់ពាក់ព័ន្ធនឹងផែនការសម្ងាត់ភេវរកម្មមួយក្នុងប្រទេសអាល្លឺម៉ង់ ។
នៅថ្ងៃទី ១៥ ខែមេសា ឆ្នាំ ២០១៩ ក្រសួងការបរទេសសហរដ្ឋអាមេរិក បានកំណត់ក្រុម IRGC រាប់បញ្ចូលទាំង កងកម្លាំង IRGC-QF ថាជា អង្គការភេវរករបរទេស ក្រោមជំពូក ២១៩ នៃច្បាប់ស្តីពីអន្តោប្រវេសន៍ និង សញ្ជាតិ ដូចដែលបានធ្វើវិសោធនកម្ម ។ ក្នុងឆ្នាំ ២០១៧ ក្រសួងរតនាគារសហរដ្ឋអាមេរិកបានកំណត់ក្រុម IRGC ថាជា ភេវរករសកលមុខសញ្ញាពិសេស ស្របតាមបទបញ្ជាដាច់ណាត់ លេខ ១៣២២៤ ដូចដែលបានធ្វើវិសោធនកម្ម ចំពោះសកម្មភាពរបស់ក្រុមនេះក្នុងការគាំទ្រដល់ក្រុម IRGC-QF ។ ជាលទ្ធផល ទ្រព្យសម្បត្តិទាំងអស់របស់ក្រុម IRGC និង ផលប្រយោជន៍ដែលបានមកពីទ្រព្យសម្បត្តិ ដែលស្ថិតក្រោមដែនយុត្តាធិការរបស់សហរដ្ឋអាមេរិក ត្រូវបានបិទ ហើយជាទូទៅ ពលរដ្ឋអាមេរិកត្រូវបានហាមឃាត់មិនឲ្យពាក់ព័ន្ធនឹងប្រតិបត្តិការណាមួយជាមួយក្រុម IRGC ឡើយ ។ វាគឺជាបទឧក្រិដ្ឋមួយក្នុងការផ្តល់ ឬ ប៉ុនប៉ង ឬ សមគំនិតផ្តល់ ដោយដឹងខ្លួនមុន នូវការគាំទ្រជាសម្ភារ ឬ ធនធានទៅឲ្យក្រុម IRGC ។
